Novas

COMEZA A NOVA TEMPADA DO CLUB DE LECTURA DE CATOIRA.

COMEZA A NOVA TEMPADA DO CLUB DE LECTURA DE CATOIRA.

 

Como xa vén acontecendo desde os últimos tres anos, o Club de Lectura de Catoira comeza unha nova tempada, que nos levará a través da lectura por mundos descoñecidos, apaixonantes, divertidos, entretidos… e que nos farán vivir unha nova vida cada vez que comezamos un novo libro.

Esta tempada comezamos coa lectura da novela Era por setembro, que xa podedes solicitar prestada na Biblioteca, de Xabier Quiroga, que virá visitarnos para conversar con nós da súa obra.

Somos xa un grupo numeroso as e os que participamos nesta actividade, que ten por único obxectivo o pasar un bo rato lendo e outros estupendos momentos falando entre nós e compartindo todo aquilo que queiramos no momento de comentar o que nos suxire a lectura dun libro.

Para poder facelo, pomos a disposición de todas e todos varios exemplares dun mesmo libro para que cada un o lea onde e cando estime máis oportuno. Despois reunímonos todas e todos unha vez ao mes para por en común as sensacións que o libro nos produciu.

Se queredes sumarvos ao noso grupo, non tedes máis que comunicalo na biblioteca.

Canto custa a actividade: é gratuíta: a Biblioteca Municipal préstache o libro.

Prazo para ler cada libro: entre quince e vinte días.

Cada canto nos reunimos: unha vez ao mes, sempre despois de ler o libro.

Onde nos reunimos: na Biblioteca Municipal do Concello de Catoira.

Que días nos reunimos: alternamos o día mes a mes: luns, martes, mércores ou xoves.

A que hora nos reunimos: en outono e primavera, ás 20:45. En inverno, ás 20:30.

Anímate a ler con nós! Estaremos encantados de recibirvos!

5 Setembro, 2019 en Sin categorizar

A xerente da SEA visita o parque empresarial de Catoira trala adxudicación dunha parcela a unha empresa de mecanizados

A xerente de SEA (Suelo Empresarial del Atlántico), Beatriz Sestayo, realizou unha visita ao polígono industrial acompañada do alcalde, Xoán Xosé Castaño. Beatriz Sestayo informou ao alcalde sobre a adxudicación, no Consello de Administración de SEA celebrado en xuño, dunha parcela de 2.133 metros cadrados no polígono industrial. O alcalde de Catoira, Xoán Xosé Castaño, explicou a obra prevista polo Concello para a mellora da seguridade viaria no acceso norte ao parque empresarial, que xa foi adxudicada.

Catoira, martes 3 setembro 2019

A xerente da sociedade Suelo Empresarial do Atlántico (SEA), Beatriz Sestayo, e o alcalde de Catoira, Xoán Castaño, mantiveron un encontro este martes para analizar posibles medidas que permitan impulsar o parque empresarial de Catoira. Na reunión participaron tamén o concelleiro de obras de Catoira, José Gonzalo López, e o responsable comercial e avogado de SEA, José Rey.

Tras unha reunión no Concello, visitaron o parque empresarial, que conta cunha superficie bruta de 91.139 metros cadrados e neta de 59.560. Despois de facer o roce do parque en xullo por parte de SEA, prevese que nas vindeiras semanas, segundo comunicou o alcalde, se inicie a obra de mellora da seguridade viaria no acceso norte ao parque cun orzamento de 119.000 euros.

ADXUDICACIÓN DE PARCELA

Pola súa banda, a xerente da SEA informou ao alcalde de que no pasado Consello de Administración de SEA, celebrado o 10 de xuño, acordouse a adxudicación da parcela 3 do Parque Empresarial de Catoira, cunha superficie total de 2.133 metros cadrados, polo prezo de 159.994 euros máis I.V.E., a unha empresa de mecanizados e caldeirería.

Durante a visita, Xoán Castaño mostrou a súa confianza en que a recente adxudicación e mellora da vía de acceso supoña o “punto de partida” da revitalización do parque empresarial. Beatriz Sestayo transmitiu a aposta de SEA, dependente do Ministerio de Fomento, polo desenvolvemento empresarial e remarcou o seu interese en fomentar activamente o parque empresarial de Catoira. O principal obxectivo de Suelo Empresarial del Atlántico, S.L., SME, é o desenvolvemento e comercialización de parques empresariais en Galicia, xestionando na actualidade 13 polígonos industriais na comunidade que suman máis de 4 millóns de metros cadrados.

 

4 Setembro, 2019 en Obras

O alcalde reúnese co xerente da EOXI para tratar a situación do centro de saúde

Son coñecidas por todos os veciños de Catoira as carencias que padecemos en relación co servizo sanitario do SERGAS. Problemas cas baixas de persoal non cubertas, o limitado tempo de atención pediátrica e deficiencias nas instalacións foron o obxecto da reunión que mantivo o alcalde de Catoira, Xoán Xosé Castaño, co xerente da Estrutura de Xestión Integrada de Pontevedra e o Salnés, José Ramón Gómez Fernández.

En moitas ocasións a solicitude dunha consulta médica por un catoirense vese satisfeita a unha semana vista. Esto débese a que a baixa dalgún dos dous médicos non se suple o que supón un grande incremento no volume de traballo do outro médico, que pode alcanzar nun día ata as sesenta e cinco citas. Tamén presentan problemas as substitucións en enfermaría, o que agrava a situación de desamparo sanitario da veciñanza.

O alcalde de Catoira mantivo devandita reunión co xerente da xestión sanitaria de Pontevedra e o Salnés para manifestarlle a necesidade de que Catoira conte cun servizo sanitario de calidade e tentar que o SERGAS solucione a problemática. Gómez Fernández recoñece a sobrecarga asistencial no centro de saúde catoirense por baixas laborais no persoal asignado ao centro, sen embargo sinalou que ningunha urxencia queda sen atención no horario do consultorio catoirense. O xerente sanitario comprometeuse a enviar puntualmente substitución do persoal médico para que mentres dure o estado de baixa da doutora, esto non supoña unha alteración na prestación do servizo. Polo tanto podería haber dous médicos a maior parte dos días independentemente das súas circunstancias persoais, o cal aliviará a situación cando algún dos dous doutores con praza en Catoira se ausente. Malia este compromiso, manifestou a imposibilidade de ampliar o servizo de atención pediátrica.

Referente ao mantemento e deficiencias no cerramento e no interior do centro sanitario, o xerente comprometeuse a estudar a súa revisión e subsanación dos desperfectos.

22 August, 2019 en Sin categorizar

Depoandaina en Catoira

O domingo 11 de agosto terá lugar en Catoira unha andaina organizada pola Deputación de Pontevedra. Inscricións ata o mércores 7 de agosto presencialmente no Concello ou telefonicamente chamando ao 986546014

A inscrición é obrigatoria.

Saída/chegada: Auditorio Municipal de Catoira
Hora de saída: 10:00
Distancia total: 10 Km
Percorrido: ida e volta
DepoAndaina “Paseo fluvial polas marismas de Catoira” Esta andaina levaranos ao concello de Catoira, con lugares de interese coma as torres de Oeste. Ten unha paisaxe formada por bosques espesos, marismas e praias fluviais, onde a figura dos muíños de vento resulta habitual.

 

 

5 August, 2019 en Sin categorizar
Top