Novas

O Concello de Catoira informa que acaba de recibir unha cisterna para a desinfección dos espazos públicos máis frecuentados, co fin de previr a expansión do coronavirus, grazas ás familias que forman Martín Códax. ás/aos socias/os desta cooperativa vitivinícola que están cedendo de forma altruísta as súas máquinas.
Estas tarefas de desinfección realizaranse con lixivia diluída en auga, de acordo coas recomendacións do persoal médico do centro de saúde. Por este motivo, esta noite a partir das 21:00 h, non poderán circular persoas polas seguintes zonas: inmediacións do centro médico, Avenida Eloy Domínguez, Rúa da Estación, urbanización das Lombas, paradas de autobuses. Tamén se roga que non se deixen estacionados vehículos no casco urbano e as zonas citadas, co fin de facilitar a mobilidade do tractor-cisterna e os traballos a realizar.
Agradecemos a colaboración de todas/os e pedimos desculpas polas molestias que se poidan ocasionar. O noso empeño non é outro que o de poñer fin canto antes a esta crise sanitaria.
FOTOGRAFÍAS cedidas por Voz de Galicia/Mónica Irago

A COMISIÓN DE SEGUEMENTO DO CORONAVIRUS, creada no Concello de Catoira o pasado 16 de marzo, adoptou na reunión desta mañá as seguintes medidas, orientadas a previr a expansión do virus:

– Posta en funcionamento dun servizo de reparto de alimentos e medicamentos para persoas que o precisen. Este servizo será coordinado polo departamento de Benestar Social do Concello, Protección Civil e o Centro de Saúde. Recoméndase solicitar un único pedido.
– Desinfección en espazos públicos sensibles pola afluencia de persoas (paradas de autobuses, supermercados, entidades bancarias, etc.)
– Desinfección nas instalacións e inmediacións da Casa do Concello e das superficies de contacto no seu interior, así como instalación de dispensadores de xel hidroalcólico nas instalacións municipais.
– Peche do paseo fluvial.
– Suspensión do mercado na Alameda do Concello.
– Comunicación á Xunta de Galicia da necesidade de prover á Agrupación de Voluntarios de Protección Civil de equipos de protección individual.
– Comunicación á Xunta de Galicia advertindo que a empresa que ten adxudicado o Servizo de Axuda no Fogar non ten medios necesarios e fundamentais para evitar posibles contaxios: mascarillas de protección, etc

O departamento de Benestar Social, en coordinación con Protección Civil e o Centro de Saúde, activouse un dispositivo de atención a persoas que se atopen soas ou sexan dependentes e precisen axuda.

XOÁN XOSÉ CASTAÑO CONDE, ALCALDE-PRESIDENTE DO CONCELLO DE CATOIRA.-
FAI SABER:

1º.- Que o goberno de España declarou, mediante Real Decreto 463/2020, de 14 de marzo, o ESTADO DE ALARMA para a xestión da situación crise sanitaria ocasionada polo COVID-19, máis coñecido por “Coronavirus”.
2º.- Que o devandito ESTADO DE ALARMA conleva unha severa limitación na liberdade de circulación das persoas, que só poderán circular polas vías de uso público para a realización das actividades que se recollen no artigo 7 do citado Real Decreto 463/2020.
3º.- Que, por outra parte, e segundo as instrucións ditadas tanto no Estado como na Xunta de Galicia, as administracións públicas están obrigadas a facilitar medidas que favorezan o traballo dende as súas casas aos empregados públicos, e sempre que sexa viable a prestación dos servizos públicos por medios non presenciais.
Na súa consecuencia, e co ánimo de contribuír ao esforzo común para paliar esta situación de emerxencia da saúde pública, e manter, na medida do posible, a prestación dos servizos públicos municipais sen risco para a saúde dos empregados públicos e dos administrados, ACÓRDASE:
I.- Os servizos administrativos municipais funcionarán con porta pechada de 9 a 14 horas, en réxime de servizos mínimos, segundo a organización interna que esta Alcaldía estableza, unha vez consultada a representación sindical dos traballadores.
II.- Os administrados serán atendidos de forma telemática, a través da sede electrónica ou chamando ao teléfono do Concello 986 54 60 14.
III.- En caso de que non se dispuxese de medios telemáticos, e só para aqueles casos de urxente necesidade, o persoal do Concello atenderá presencialmente, previa petición de cita telefónica, no horario sinalado no apartado I.

Catoira, 16 de marzo de 2020.

BANDO SOBRE MEDIDAS DE PREVENCIÓN POR CORONAVIRUS

XOÁN XOSÉ CASTAÑO CONDE, ALCALDE-PRESIDENTE DO CONCELLO DE CATOIRA.-
FAI SABER:

Ante as recomendacións da Consellería de Sanidade, o Goberno Local decidiu adoptar as seguintes medidas para previr os contaxios por coranavirus.
Lamentamos as molestias que se poidan ocasionar e rogámoslle a toda a veciñanza que manteña a calma e siga as indicacións das autoridades sanitarias.
MEDIDAS DE DISTANCIAMENTO SOCIAL E PREVENCIÓN DE CONTAXIO POR CORONAVIRUS
O Goberno Local do Concello de Catoira acordou tomar unha serie de medidas encamiñadas a garantir o distanciamento social e previr o contaxio por coronavirus entre a veciñanza de Catoira, que entran en vigor o venres día 13 de marzo de 2020 e que estarán vixentes durante un período de 14 días, sempre a expensas da evolución da situación e das instrucións das autoridades competentes.
Primeiro.- Todos os centros sociais e culturais e todas as instalacións municipais (Escola Infantil de Dimo, CEMUMA, Aula CeMIT, Centros Sociais das parroquias, pavillón….) permanecerán pechadas e todas as actividades que alí se celebran permanecerán canceladas. Tan só se manterán abertas as oficinas municipais e Xulgado de Paz para trámites urxentes. Todas as xestións deberán realizarse preferentemente por vía telefónica e sede electrónica.
Segundo.- Todas as actividades culturais, deportivas ou sociais ou de calquera outra natureza, sexan organizadas polo Concello ou celebradas en instalacións municipais quedarán canceladas.
Terceiro.- Todos os cursos de formación, e outras actividades dependentes do Concello ou celebradas en instalacións municipais, tales como clases de música, teatro, etc. quedarán canceladas.
Cuarto.- As instalacións deportivas do Concello de Catoira permanecerán pechadas, incluídos campos de fútbol, polideportivo, etc.
Quinto.- Recomendamos tamén, na medida do posible, evitar os lugares públicos tales como parques infantís.
As medidas sinaladas quedan condicionadas a calquera variación que determinen as autoridades competentes autonómicas ou estatais.

Catoira, 13 de marzo de 2020

O Concello de Catoira convoca un desfile e concurso de disfraces e comparsas que se celebrará o día 23 de febreiro de 2020, ás 17:30 horas, e que se rexerá polas seguintes bases:

20200128_Comunicación cidadán_20200128BasesEntroido