NOVA CANLE DE DIFUSIÓN DE NOVAS DO CONCELLO DE CATOIRA EN WHATSAPP

O novo servizo municipal de información e avisos por whatsapp comezará a funcionar o luns 14 de novembro de 2022. O usuario só deberá solicitar a alta e gardar o contacto do servizo no seu teléfono móbil.
As persoas que desexen darse de alta neste servizo gratuíto tan só terán que enviar unha mensaxe de whatsapp ao número +34 680 52 17 94 coa palabra ALTA. A fin de recibir correctamente as notificacións, debe gardar o número de teléfono do servizo nos seus contactos.
Con este servizo, que ven a complementar outros como os perfís en redes sociais ou a páxina web municipal ábrese unha nova canle de comunicación coa veciñanza para mantela informada do que acontece no Concello.

 

O DEPUTADO PROVINCIAL, GREGORIO AGÍS, E O ALCALDE DE CATOIRA, ALBERTO GARCÍA VISITARON A FUTURA CASA DAS ARTES E O CACTO.

A Deputación de Pontevedra e o Concello de Catoira presentaron así un proxecto que conta cun orzamento de 449.248 euros financiados integramente pola institución provincial, que aporta 381.861 euros co Plan ReacPon e xa concedeu a Catoira os 67.397 euros restantes a través do Plan Concellos.

Esta actuación permitirá aglutinar nun só edificio as diferentes escolas municipais (pandeireta, gaita, artes plásticas ou teatro, entre outras) que na actualidade están dispersas por varios locais. Ademais, o inmoble acollerá a radio municipal.

A Casa das Artes será un espazo integrador da vida cultural do Concello. Está concibida como un lugar totalmente accesible, sen barreiras arquitectónicas, e que se dotará de ramplas e dun ascensor. Contará con varias zonas diferenciadas como un espazo aberto destinado a zona de estudo e uso de tecnoloxías ou un grande salón polivalente, onde se poderán levar as actividades das escolas, que disporá dun tabique móbil para gañar en flexibilidade de usos delimitando os espazos interiores en función das necesidades que existan en cada momento. A sostibilidade foi unha das premisas que estivo en todo o momento sobre a mesa cando se formulou este proxecto, que segue a liña dos obxectivos do Plan ReacPon da Deputación. Neste senso, a antiga casa consistorial converterase nun lugar «descarbonizado» cunha envolvente térmica óptima, máquinas de climatización e produción de auga quente sanitaria e paneis fotovoltaicos que reducirán a dependencia enerxética das instalacións. Na mesma liña melloraranse os illamentos térmicos para optimizar o consumo de enerxía e apostarase sistemas renovables, paneis acústicos e sistemas e materiais que garantan as condicións de hixiene, saúde e protección do medio ambiente.

Tras este acto visitouse o CACTO cuxo contido foi unha inversión do plan rehabilita da Deputación que supuxo unha inversión de 400.000€

Catoira presumirá de gastronomía local o próximo 18 de agosto co evento “saborEarte”

A terraza da Casa do Concello será escenario dunha mostra de cociña con degustación como parte das actividades de ‘saborEarte’. O proxecto, integrado no programa O Teu Xacobeo da Xunta de Galicia, busca a promoción do Camiño
desde o punto de vista gastronómico.

As persoas interesadas en participar neste evento gratuíto deberán inscribirse por teléfono ou correo electrónico.

O xoves 18 de agosto, Catoira ten unha cita co mellor da súa gastronomía no evento gratuíto ‘saborEarte’. Será a partir das
19:00h cando a terraza da Casa do Concello albergue un showcooking con degustación baseado nos produtos de proximidade do municipio. A iniciativa, promovida polo programa Ou Teu Xacobeo da Xunta de Galicia e liderada polo cociñeiro Miguel Mosteiro, busca poñer en valor as gastronomías do Camiño como recurso de alto valor turístico. O acto servirá tamén para inaugurar a terraza do edificio consistorial, recentemente acondicionada para acoller actividades municipais.
Na súa segunda edición, o proxecto ‘saborEarte’ quere continuar destacando o potencial turístico da cociña de proximidade dos distintos roteiros do Camiño. Para iso servirase de eventos gastronómicos nos que os participantes terán a oportunidade de asistir a un showcooking baseado en produtos quilómetro cero e degustar as diferentes propostas elaboradas en directo polo cociñeiro Miguel Mosteiro.

Ademais de presentar algúns dos produtos máis destacados da zona e sinalar o seu potencial para a promoción local, os eventos ‘saborEarte’ abordan outras cuestións estreitamente ligadas á cociña de proximidade como a ecoloxía e o desenvolvemento
sostible.

Cada xornada contará tamén cun pequeno taller de fotografía gastronómica, a cargo do fotógrafo Adolfo Enríquez. A súa misión será mostrar aos asistentes como sacar o maior partido ás instantáneas de pratos e produtos, multiplicando o seu atractivo e potencial como reclamo turístico. As imaxes resultantes empregaranse para deseñar unha mostra itinerante que volverá aos concellos participantes no mes de setembro.

A de Catoira será a segunda das cinco citas que, ao longo do mes de agosto, percorrerán municipios integrados no Roteiro do Mar de Arousa e Río Ulla, Camiño Francés, Camiño Inglés e Camiño de Inverno.

A participación na actividade é totalmente gratuíta, con prazas limitadas para 30 persoas. A inscrición para o evento deste xoves xa pode realizarse a través do teléfono 986546014 (departamento de cultura) ou do correo electrónico concello.catoira@eidolocal.es (indicando no asunto “inscripción saborEarte”)

A ROMARÍA VIKINGA VOLVE Á NORMALIDADE BATENDO RÉCORD DE PÚBLICO

Aínda que a Romaría Vikinga estivo presente estes dous últimos anos de pandemia, foi nesta 62 edición cando se recuperou a normalidade, e superando todas as expectativas.
 
O alcalde, Alberto García, destaca que non se rexistrou ningunha incidencia que puidese alterar o desenvolvemento das distintas actividades programadas e cualifica de rotundo éxito a organización e o público que se rexistrou nestes días. Nos concertos do Vikinsons congregáronse unhas 6000 persoas cada día, e o Desembarco rexistrou a maior afluencia de público da historia de festa. Nesta semana estímase que se achegaron a Catoira máis de 130.000 persoas.
 
O Goberno local agradece a implicación das distintas institucións e entidades colaboradoras, así como do persoal do Concello, dos voluntarios, das/os veciñas/os de Catoira participantes, e da cidadanía en xeral, que soubo gozar desta magnífica festa con responsabilidade.

PROGRAMACIÓN DA 62 EDICIÓN DA ROMARÍA VIKINGA DE CATOIRA 2022

TEATRO:
 
Fragmentos de Apocalipse. Escola Municipal Úrsula Teatro de Catoira 2, 3, 4 de agosto / 22:00 h Recinto das Torres de Oeste
 
 
ANIMACIÓN:
Alameda do Concello
  • Circo Chosco – Oh Pera / Mércores 3 de agosto / 12:00 h
  • Crunch! Muu / Venres 5 de agosto / 20:15 h
  • Os Bregadiers / Venres 5 de agosto / 21:15 h
  • Upsala Medieval:
    • Sábado 6 de agosto / 19:00 h / Alameda do Concello
    • Sábado 6 de agosto / 22:00 h / Pasarrúas desde a Avenida Eloy Domínguez ata a Praia fluvial
VIKINSONS
 
Praia Fluvial de Catoira
  • Tanxugueiras – Batucada os Vikingos – Sacha na Horta / Venres 5 de agosto / 23:00 h
  • Os Vacalouras – Heredeiros da Crus / Sábado 6 de agosto / 23:00 h
 
 
DESEMBARCO VIKINGO
 
Domingo 7 de agosto / Recinto das Torres de Oeste
  • 10:00 h Pasarrúas desde a Alameda do Concello ata as Torres de Oeste:
    • Pandeireteiras Muíños do Vento
    • Brisas do Río Ulla
    • Aires do río vello
  • 11:00 h Mexillonada e viño tinto do Ulla e mercado medieval
  • 12:00 h Actuacións de Troula e Upsala Medieval
  • 13:00 h Dramatización do desembarco vikingo
  • 13:45 h Actuacións de Troula e Upsala Medieval
  • 14:00 h Xantar campestre

HEREDEIROS DA CRUS ACTUARÁN O SÁBADO 6 DE AGOSTO NA PRAIA FLUVIAL DE CATOIRA

Temos a segunda confirmación para o festival Vikinsons 2022. 🎤🎸🥳

 

A Xunta de Galicia, por mediacion da Consellería de Cultura, Educación, Formación Profesional e Universidades, e o Concello de Catoira confirman a actuación de Heredeiros da Crus para o sábado 6 de agosto na praia fluvial de Catoira con entrada de balde!!

 

O Concello correrá cos gastos de produción (iluminación, son, escenario…) do festival vikinsons, que suporán unha inversión de arredor dos 15000€

 

ABERTO O PRAZO DE INSCRIPCIÓN NA ESCOLA DE MÚSICA MUNICIPAL PARA O CURSO 2022/2023

Está aberto o prazo de inscrición na a escola de música municipal para o curso 2022/23
PRAZO: ata o 1 de xullo de 2022
DOCUMENTACIÓN:
▪ Impreso de inscrición
▪ Fotocopia do DNI ou do libro de familia (só alumnado de novo ingreso)
▪ Foto tamaño carné (só alumnado de novo ingreso)
➢ LUGAR: Escola de Música Municipal de Catoira – avda. Eloy Domínguez nº10
➢ HORARIO: de luns a sábados de 10:00 a 12:00h de luns a venres de 17:00 a 20:00h
➢ INSCRICIÓN: A documentación poderase solicitar e entregar na oficina da Escola de música ou no correo esmu.municipal.catoira@gmail.com
+INFO: Escola de Música Municipal de Catoira teléf.:676336288 – esmu.municipal.catoira@gmail.com
Enlace ao formulario de google:

O CONCELLO DE CATOIRA AMPLÍA OS CONTIDOS DO CACTO CON PANEIS SOBRE A ETAPA VISIGODA E O SÍMBOLO DE XELMÍREZ

O Concello de Catoira vén de instalar novos recursos expositivos no Centro de Activación Cultural (CACTO) en presenza do alcalde Alberto García. Trátase dun panel informativo sobre a época visigoda, xunto cunha réplica dunha moeda acuñada en Catoira, e outro panel sobre o “signo rodado” que utilizaba o arcebispo Xelmírez para autenticar os seus documentos.

A finais do S.VI os visigodos expulsaron os suevos e converteron Galicia nunha provincia goda. Nesa etapa hai indicios da presenza dunha ceca en Catoira na que se puido acuñar moeda. Agora pode verse no CACTO a réplica dunha moeda de ouro da época do rei Witericus (603-609) que leva no reverse inscrita a palabra CATORA.

O panel sobre a firma de Xelmírez reproduce graficamente o característico “signo rodado” que utilizou o arcebispo desde 1115 como símbolo de autoridade nos seus documentos.

 

O CONCELLO DE CATOIRA E A MESA DAS VERBAS HOMENAXEAN A BALDOMERO ISORNA

O pasado sábado Catoira acolleu unha xeira organizada polo colectivo vilagarcián Mesa das Verbas dedicada ao poeta catoirense Baldomero Isorna Casal.
A xornada comezou pola mañá no recinto das Torres de Oeste. Na Capela de Santiago recitaron algúns poemas e lembraron a figura de Faustino Rey Romero, tamén poeta, que xunto a Baldomero Isorna -ambos membros do Ateneo do Ullán- foron os impulsores da celebración da Romaría Vikinga. A continuación fixeron unha visita guiada ao Centro de Activación Cultural Torres de Oeste. Pola tarde, o alcalde, Alberto García, presentou o recital que tivo lugar na Sala Celso Emilio Ferreiro. O rianxeiro Xesús Santos foi o encargado de realizar unha semblanza do poeta catoirés.
Ademais dalgúns poemas de Campanas de palo e Voz en blanco, as dúas publicacións de Isorna, tamén se recitaron composicións dalgúns membros da Mesa.

O AUDITORIO DE CATOIRA ACOLLE ESTA SEMANA A OBRA DO CENTRO DRAMÁTICO GALEGO “ÁS OITO DA TARDE, CANDO MORREN AS NAIS”

O director da unidade teatral da Xunta, Fran Núñez, e o alcalde, Alberto García, presentaron esta mañá a montaxe, que estará no Auditorio de Catoira do 26 ao 29 de maio, con todas as funcións inclusivas.

Con dirección e dramaturxia de Marta Pazos, a peza conta no elenco con Camila Bossa, Sabela Domínguez, Xosé Manuel Esperante, Davide González, María Llanderas, Alba Loureiro e Toni Salgado.

“Ás oito da tarde, cando morren as nais” estará no Auditorio de Catoira desde este xoves, cunha primeira función matutina destinada a alumnado de ensino Secundario e de Bacharelato. O venres e sábado, as sesións serán ás 21,00 horas e o domingo, ás 19,00 horas. As entradas para asistir están xa á venda na web ataquilla.com a un prezo de catro euros, con descontos para diversos colectivos, e poderán adquirirse tamén no despacho de billetes desde unha hora antes da función.

Recomendado para maiores de 12 anos, o espectáculo sitúa o público como elemento central e analiza de xeito crítico e irónico a relación entre o teatro e a súa recepción, cunha escenografía que reproduce un espazo de exhibición escénica.

Segundo destacou Fran Núñez, está confirmada xa a asistencia de veciñanza dos concellos de Vilagarcía de Arousa, Cambados e Gondomar, ao abeiro do programa de mobilidade do CDG, que permite contratar autobuses ao servizo dos concellos interesados en desprazar público a Catoira.

Ademais, por primeira vez todas as representacións serán inclusivas, grazas ao sistema posto en marcha pola Consellería de Cultura, Educación e Universidade que permite dispoñer de interpretación en lingua de signos, subtitulado e audiodescrición en todas as producións, tanto no Salón Teatro coma noutros espazos.

Pola súa parte, o alcalde, Alberto García, agradeceu a colaboración do CDG e a inclusión de Catoira nesta xira, apostando por fomentar o teatro e o acceso a grandes producións en concellos pequenos.

Estreada o pasado 15 de abril no Salón Teatro de Santiago, a produción “Ás oito da tarde, cando morren as nais”, iniciou o percorrido en Cee, viaxando logo a Portugal para ofrecer funcións en Beja, no marco do Festival Internacional de Teatro do Alentejo, e regresando a Galicia o 19 de maio con parada en Cedeira, onde permaneceu ata o 22. A xira chega agora ao Auditorio Municipal de Catoira, que acolle a montaxe do 26 ao 29, e finaliza no Teatro Principal da Estrada do 2 ao 5 de xuño.

Top