GOZA DO ULLA 2022 – CATOIRA: DE PEDRAS MIUDAS Á RIBEIRA DO ULLA

Data: Domingo. 2 de outubro de 2022
Hora de saída: 10:00h.
Distancia: 12 Km.
Dificultade: Media-Baixa
Punto de encontro: Concello de Catoira
Contacto e Información:
• Tel: 986 546 014 (Departamento de Cultura)
• Correo electrónico: cultura@catoira.gal
O percorrido parte da casa do Concello. Cruzando a aldea de Trasdaveiga subimos aos Muíños do Vento para descender logo ata a Lagoa Pedras Miúdas. Seguimos descendendo ata o sendeiro do Río Catoira que nos leva ó Muíño do Cura (de marea) e enlaza co sendeiro polo borde do Río Ulla. Pasaremos pola Praia Fluvial, as Torres de Oeste a zona de brañas incluídas na Rede Natura 2000.
Retornaremos polo mesmo percorrido, pasando onda o Centro de Activación Cultural Torres de Oeste (CACTO) e regresando ata a Fonte Gaiteira.

 

NOTA INFORMATIVA

A empresa STAC (Sistemas Técnicos del Accesorio y Componentes) é a propietaria dos antigos terreos de Cedonosa nos que pretende exercer proximamente a súa actividade.
Toda aquela persoa que desexe solicitar un posto de traballo nesta empresa pode presentar o seu Curriculum Vitae no Departamento de Emprego deste Concello o cal, posteriormente, os trasladará á citada empresa.
Catoira, 6 de Setembro de 2022
O Alcalde
D. Alberto García García

NOTA INFORMATIVA

Ante a desinformación e manipulación que se está levando a cabo coa obra de “CREACIÓN DE CUBERTA NO PARQUE INFANTIL DA ALAMEDA DE CATOIRA” véxome na obriga de informar o seguinte:

  1. A solicitude de subvención para a realización da citada obra é iniciativa deste Alcalde, con data do 10/02/2022.
  2. O orzamento total da obra é de 48.398,73 €, dos cales o Concello de Catoira aporta 9.679,75 €, polo que a Xunta de Galicia, aporta 38.718,98 €, e non 48.398,73 €.
  3. O día 10/2/2022, cando se presenta a solicitude da subvención na sede electrónica da Xunta de Galicia, comunícaselle ao concelleiro do PP.
  4. Con data do 8/7/2022, por Resolución deste alcalde adxudicouse a citada obra á empresa Construcciones Lemos Martínez, S.L., por importe de 48.245€, sendo a oferta económica máis vantaxosa. Para a contratación da obra, presentáronse ademais as seguintes empresas: Movimiento de Aridos y Construcciones de Arosa, S.L., Padinsa Salnés, Reformas 3 Torres, S.L.

Esperamos que con esta información quede aclarado para os veciños/as de Catoira.

E para rematar, dicir que os cartos destinados á realización de obras no Concello, non son nin do BNG, nin do PP, nin di PSOE, son do Concello e dos veciños/as de Catoira que lle corresponden polo pago dos seus impostos.

Catoira, 25 de agosto de 2022.

O Alcalde – Presidente.

Alberto García García.

NOTA INFORMATIVA PARQUE

HUMANIZACIÓN E RECUPERACIÓN DO ESPAZO PÚBLICO DO ENTORNO DA PRAZA DO CONCELLO

O Concello de Catoira está concienciado sobre a necesidade de recuperar os espazos peonís dentro do espazo público, facilitar os desprazamentos non motorizados, e a creación de itinerarios peonís seguros, accesibles e agradables que conecten os centros de actividade máis importantes do Concello.

O presente proxecto contempla as actuacións necesarias para reordenar e acondicionar o espazo público existente fronte ao Concello, xerando unha nova praza para uso e goce das persoas, restrinxindo o acceso ao tráfico rodado soamente persoas de mobilidade reducida e servizos puntuais de carga e descarga. Para iso contémplase unha renovación total dos pavimentos e de servizos como a iluminación, así como a plantación de novo arboredo e a instalación de novo mobiliario urbano. A actuación comprende unha superficie de 2.280m2.

O proxecto foi analizado polo alcalde Alberto García e o deputado Gregorio Agís, na súa visita ao Concello do pasado mércores 24 de agosto. O orzamento base de licitación (con IVE) é de 612.515,26€

O DEPUTADO PROVINCIAL, GREGORIO AGÍS, E O ALCALDE DE CATOIRA, ALBERTO GARCÍA VISITARON A FUTURA CASA DAS ARTES E O CACTO.

A Deputación de Pontevedra e o Concello de Catoira presentaron así un proxecto que conta cun orzamento de 449.248 euros financiados integramente pola institución provincial, que aporta 381.861 euros co Plan ReacPon e xa concedeu a Catoira os 67.397 euros restantes a través do Plan Concellos.

Esta actuación permitirá aglutinar nun só edificio as diferentes escolas municipais (pandeireta, gaita, artes plásticas ou teatro, entre outras) que na actualidade están dispersas por varios locais. Ademais, o inmoble acollerá a radio municipal.

A Casa das Artes será un espazo integrador da vida cultural do Concello. Está concibida como un lugar totalmente accesible, sen barreiras arquitectónicas, e que se dotará de ramplas e dun ascensor. Contará con varias zonas diferenciadas como un espazo aberto destinado a zona de estudo e uso de tecnoloxías ou un grande salón polivalente, onde se poderán levar as actividades das escolas, que disporá dun tabique móbil para gañar en flexibilidade de usos delimitando os espazos interiores en función das necesidades que existan en cada momento. A sostibilidade foi unha das premisas que estivo en todo o momento sobre a mesa cando se formulou este proxecto, que segue a liña dos obxectivos do Plan ReacPon da Deputación. Neste senso, a antiga casa consistorial converterase nun lugar «descarbonizado» cunha envolvente térmica óptima, máquinas de climatización e produción de auga quente sanitaria e paneis fotovoltaicos que reducirán a dependencia enerxética das instalacións. Na mesma liña melloraranse os illamentos térmicos para optimizar o consumo de enerxía e apostarase sistemas renovables, paneis acústicos e sistemas e materiais que garantan as condicións de hixiene, saúde e protección do medio ambiente.

Tras este acto visitouse o CACTO cuxo contido foi unha inversión do plan rehabilita da Deputación que supuxo unha inversión de 400.000€

A DEPUTACIÓN PROVINCIAL DE PONTEVEDRA CONCEDE UNHA SUBVENCIÓN AO CONCELLO DE CATOIRA

A Deputación Provincial de Pontevedra, concedeu ao Concello de Catoira, ao abeiro das bases reguladoras e convocatoria de “SUBVENCIÓNS PARA A REDACCIÓN DE PROXECTOS OU EXECUCIÓN DE OBRAS DE MOBILIDADE AMABLE E RECUPERACIÓN DE ESPAZOS PÚBLICOS DOS CONCELLOS DA REDE ÁGORA, unha subvención de 50.000,00 €, con destino ao investimento denominado “HUMANIZACIÓN E RECUPERACIÓN DO ESPAZO PÚBLICO NO ENTORNO DA PRAZA DO CONCELLO DE CATOIRA”.

A subvención foi concedida mediante Resolución da Xunta de Goberno da Deputación Provincial de Pontevedra, con data do 6 de agosto de 2021.

BONO CULTURAL DE 400 EUROS PARA NACIDAS/OS NO ANO 2004

O Bono Cultural é unha axuda económica destinada ás persoas que nacesen no ano 2004. O prazo de solicitude deste bono abriuse o pasado 25 de xullo, e permanecerá aberto ata o 15 de outubro.
A axuda económica proporcionada polo bono cultural estará dividida en tres apartados para fomentar o descubrimento de diversas actividades culturais:
• O 50% será destinado a artes en vivo, patrimonio cultural e artes audiovisuais
• Un 25% será destinado a produtos en soporte físico
• Outro 25% será destinado a consumo dixital ou en liña
Para máis información sobre como solicitar esta axuda:

Catoira presumirá de gastronomía local o próximo 18 de agosto co evento “saborEarte”

A terraza da Casa do Concello será escenario dunha mostra de cociña con degustación como parte das actividades de ‘saborEarte’. O proxecto, integrado no programa O Teu Xacobeo da Xunta de Galicia, busca a promoción do Camiño
desde o punto de vista gastronómico.

As persoas interesadas en participar neste evento gratuíto deberán inscribirse por teléfono ou correo electrónico.

O xoves 18 de agosto, Catoira ten unha cita co mellor da súa gastronomía no evento gratuíto ‘saborEarte’. Será a partir das
19:00h cando a terraza da Casa do Concello albergue un showcooking con degustación baseado nos produtos de proximidade do municipio. A iniciativa, promovida polo programa Ou Teu Xacobeo da Xunta de Galicia e liderada polo cociñeiro Miguel Mosteiro, busca poñer en valor as gastronomías do Camiño como recurso de alto valor turístico. O acto servirá tamén para inaugurar a terraza do edificio consistorial, recentemente acondicionada para acoller actividades municipais.
Na súa segunda edición, o proxecto ‘saborEarte’ quere continuar destacando o potencial turístico da cociña de proximidade dos distintos roteiros do Camiño. Para iso servirase de eventos gastronómicos nos que os participantes terán a oportunidade de asistir a un showcooking baseado en produtos quilómetro cero e degustar as diferentes propostas elaboradas en directo polo cociñeiro Miguel Mosteiro.

Ademais de presentar algúns dos produtos máis destacados da zona e sinalar o seu potencial para a promoción local, os eventos ‘saborEarte’ abordan outras cuestións estreitamente ligadas á cociña de proximidade como a ecoloxía e o desenvolvemento
sostible.

Cada xornada contará tamén cun pequeno taller de fotografía gastronómica, a cargo do fotógrafo Adolfo Enríquez. A súa misión será mostrar aos asistentes como sacar o maior partido ás instantáneas de pratos e produtos, multiplicando o seu atractivo e potencial como reclamo turístico. As imaxes resultantes empregaranse para deseñar unha mostra itinerante que volverá aos concellos participantes no mes de setembro.

A de Catoira será a segunda das cinco citas que, ao longo do mes de agosto, percorrerán municipios integrados no Roteiro do Mar de Arousa e Río Ulla, Camiño Francés, Camiño Inglés e Camiño de Inverno.

A participación na actividade é totalmente gratuíta, con prazas limitadas para 30 persoas. A inscrición para o evento deste xoves xa pode realizarse a través do teléfono 986546014 (departamento de cultura) ou do correo electrónico concello.catoira@eidolocal.es (indicando no asunto “inscripción saborEarte”)

NOTA DE PRENSA

Ante a manifestación convocada para o venres ao serán no noso municipio de Catoira, para protestar pola iniciativa dunha empresa privada de ubicar un almacén de pirotecnia no lugar de Coaxe, esta Alcaldía quere saír ao paso do montón de falsidades que se están a manexar, seguramente alentadas polo BNG, grupo político que xa demostrou a súa incompetencia como gobernantes, pero que non lles importa utilizar a mentira como arma política:
1º.- É absolutamente falso que exista ningunha instalación que teña permiso para a actividade de almacén de pirotecnia, e se chega a existir, será porque as administracións que teñen competencia na materia e as facultades legais para autorizalo, é dicir, a administración Autonómica e a do Estado, o permiten cos seus informes favorables.
2º.- Esta administración municipal tomou razón, polo procedemento de obra menor e comunicación previa, da solicitude para a construción dun galpón para almacén de apeiros de labranza é, polo tanto, ese é o destino da obra e non outro, posto que, como queda dito, se a empresa promotora quere dedicar o galpón a outra actividade, terá que contar cos informes e autorizacións sectoriais (da Xunta e do Estado) que o permitan, así como tramitar o oportuno expediente de actividade ante esta administración municipal, que actuará en consecuencia coa
lexislación vixente, o que, ata a data, non ten acaecido.
3º.- Polo contrario, esta Alcaldía dirixiuse, con data do 1º de xullo, á Subdelegación do Goberno en Pontevedra para que se lle informara da existencia, ou non, da iniciativa que causa tanta preocupación na veciñanza, recibindo a contestación en forma de escrito, datado o día 5 do mesmo mes, solicitando que se emitira un informe sobre a posibilidade urbanística da construción dun almacén de produtos pirotécnicos.
4º.- Esta Alcaldía, con data do 19 de xullo, remitiu á Subdelegación o informe requirido, que remataba do xeito seguinte: “quero deixar claro, unha vez máis, a miña oposición á concesión de autorización administrativa a PIROGAL PIROTECNIA, S.L., para o establecemento do depósito-taller de cartuchería o pirotecnia a ubicar no Perneto, lugar de Coaxe, parroquia de Dimo, deste termo municipal, e a miña rotunda desconformidade coa execución da citada iniciativa empresarial.”
5º.- Toda esta información a coñecen, de primeira man, as persoas que lideran este malestar veciñal, en conivencia con BNG, xa que logo esta Alcaldía mantivo unha reunión persoal con elas e tiveron ocasión de examinar o expediente do galpón, así como obter copias da documentación do mesmo, por isto faltan á verdade cando acusan á Alcaldía de ocultar datos ou de falta de información, pois os seus intereses non son tanto os de defender aos veciños como os de atacar á miña persoa utilizando a mentira, a falsidade e o insulto.
Pregúntome, por último, si estas persoas, que supoño son membros da Comunidade de Montes en Man Común de Dimo, foron informadas polo Presidente da citada Comunidade e a súa
Directiva, da venta da parcela e da intención da empresa de pirotecnia de dedicala á citada actividade, é dicir, se recibiron toda a información oportuna como esta Alcaldía ten ofrecido ao longo destes días.
Catoira, 11 de agosto de 2022..- Asdo. Alberto García García.
Top