Patrimonio

A Axencia Estatal do Consello Superior de Investigacións Científicas (CSIC), a través do Instituto de Ciencias do Patrimonio (INCIPIT), comezou onte os traballos de prospección xeofísica e teledetección no recinto das Torres de Oeste. O alcalde, Alberto García, e o tenente alcalde, Javier César, supervisaron esta mañá as actuacións que se están a realizar.

Os técnicos, coordinados polo director científico, César Parcero, e a dirección técnica de Carlos Otero, comezaron este luns coa prospección xeofísica con gradiómetro da totalidade do xacemento, excepto nas propias torres. Tamén se están a efectuar voos de dron para obter unha topografía de alta precisión, incluíndo a Illa Castrivello, e vaise realizar outro voo de infravermellos para detectar muros, fosos ou estruturas subterráneas.

Nas próximas semanas tamén está previsto utilizar xeoradar nalgunhas das partes de máis interese do xacemento. Esta técnica, complementaria e diferente aos infravermellos, tamén permite detectar estruturas soterradas, facendo un mapa do subsolo.

Esta intervención será de mínima invasión, permitindo obter información sen producir grandes impactos. Unha vez finalizados os traballos, os técnicos entregarán ao Concello e á Deputación de Pontevedra un mapa dixital composto por varias capas cos resultados dos estudos, que permitirán obter unha topografía de moi boa calidade, as estruturas soterradas e unha fotografía do recinto de alta definición.

Este proxecto arqueolóxico, froito dun convenio entre a Deputación de Pontevedra e o CSIC-INCIPIT, súmase á sondaxe realizada o pasado mes de febreiro no lugar de A Capela (San Salvador), impulsada polo Concello de Catoira.

A Deputación Provincial de Pontevedra, ven de conceder ao Concello de Catoira, ao abeiro das bases reguladoras e convocatoria do “PLAN DE OBRAS E SERVIZOS (PLAN CONCELLOS 2022-2023”, liña 1, unha subvención de 20.084,30 €, con destino ao financiamento da actuación denominada “ACTUACIÓNS PARA A POSTA EN VALOR DO PATRIMONIO CULTURAL DE CATOIRA” cun orzamento polo mesmo importe.

A subvención foi concedida mediante Resolución da Presidencia da Deputación Provincial, con data do 24 de xaneiro de 2023, e comunicada á administración municipal con data do 25 de xaneiro de 2022.

O Concello procederá, en breve, a tramitar o expediente de contratación da citada obra, e o abono da subvención farase tendo en conta as certificacións que se vaian aprobando da mesma.

Catoira, 6 de marzo de 2023.

ANUNCIO PUBLICIDADE DA SUBVENCIÓN DEPUTACION PLAN CONCELLOS – PATRIMONIO

A DEPUTACIÓN PROVINCIAL DE PONTEVEDRA CONCEDE UNHA SUBVENCIÓN AO CONCELLO DE CATOIRA

A Deputación Provincial de Pontevedra, ven de conceder ao Concello de Catoira, ao abeiro das bases reguladoras e convocatoria de subvención para “A SUPRESIÓN DA SIMBOLOXÍA FRANQUISTA NOS ESPAZOS PÚBLICOS E A REHABILITACIÓN E SINALIZACIÓN DO PATRIMONIO HISTÓRICO-CULTURAL DIRIXIDAS AOS CONCELLOS DA PROVINCIA DE PONTEVEDRA PARA O ANO 2022”, unha subvención por importe de 5.916,90 € para a execución da actuación denominada “SINALIZACIÓN E POSTA EN VALOR DO PETRÓGLIFO DAS TIXOLAS”, cun orzamento de CINCO MIL NOVECENTOS DEZASEIS EUROS CON NOVENTA CÉNTIMOS (5.916,90 €), IVE incluído.

A subvención foi acordada na Xunta de Goberno da Deputación de Pontevedra, na sesión do 1 de xullo de 2022.

De seguido procederase a tramitar o oportuno expediente de contratación para que a actuación, poida atoparse executada na súa totalidade antes do 30 de xuño de 2023.

Catoira, 14 de decembro de 2022.

O ALCALDE-PRESIDENTE

Asdo. Alberto García García.

ANUNCIO PUBLICIDADE DA SUBVENCIÓN DEPUTACION PEDRA TIXOLAS

Apenas un ano despois de que o Concello de Catoira instalase na entrada ao recinto das Torres de Oeste un panel informativo sobre o conxunto monumental, os inimigos do público e do alleo arrincárono do soporte e roubárono.

Na mañá de onte o alcalde, Alberto García, supervisou a instalación dunha nova copia e lamentou o sucedido, destacando que, ademais de incluír texto en español e galego, o cartel recolle a información sobre as Torres de Oeste en Braille, co fin de favorecer que as persoas con discapacidade visual poidan coñecer e desfrutar do noso patrimonio.

A Deputación Provincial de Pontevedra, ven de conceder ao Concello de Catoira, ao abeiro das bases reguladoras e convocatoria de subvención para “A SUPRESIÓN DA SIMBOLOXÍA FRANQUISTA NOS ESPAZOS PÚBLICOS E A REHABILITACIÓN E SINALIZACIÓN DO PATRIMONIO HISTÓRICO-CULTURAL DIRIXIDAS AOS CONCELLOS DA PROVINCIA DE PONTEVEDRA PARA O ANO 2021”, unha subvención por importe de 5.898,50 € para a execución da actuación denominada “SINALIZACIÓN E POSTA EN VALOR DOS PETRÓGLIFOS DE PEDRAS MINAS”, cun orzamento de cinco mil novecentos oitenta e nove euros con cincuenta céntimos (5.989,50 €), IVE incluído.

A subvención foi acordada na Xunta de Goberno da Deputación de Pontevedra, na sesión do 10 de decembro de 2021, e notificada ao Concello de Catoira, con data do 16 de decembro de 2021.

De seguido procederase a tramitar o oportuno expediente de contratación para que a actuación poida atoparse executada na súa totalidade antes do 15 de setembro de 2022.

Os petróglifos de Pedras Minas, recentemente descubertos, son un todo un referente na arte rupestre da provincia de Pontevedra. O conxunto atópase nun lugar actualmente non indicado así como con nula infraestrutura de visita, que permita a contemplación do elemento sen afectar ao mesmo. Con tal motivo solicitouse ésta subvención para mellorar a súa contorna inmediata.

Os obxectivos desta actuación son:

• Contribuír á posta en valor do patrimonio arqueolóxico de Catoira.
• Contribuír á difusión do patrimonio entre os veciños.
• Adecuar para a visita uns importantes recursos turísticos do concello.

A actuación pretende crear unha infraestrutura de interpretación para os petróglifos de Pedras Minas, acondicionando o terreo onde se sitúan así como estudando os seus motivos para a divulgación a través de paneis explicativos.
Todos estes traballos contarán cunha estrita supervisión arqueolóxica.
Nun primeiro momento realizarase a corta da vexetación existente no lugar. Finalmente instalarase unha pasarela de contemplación de motivos así como panelería interpretativa.