A LINGUA GALEGA NA TRANSMISIÓN DA HISTORIA LOCAL DE CATOIRA

A veciñanza de Catoira pode coñecer desde hoxe o resultado do proxecto de investigación, recuperación e divulgación da historia do noso municipio impulsado polo goberno local. Na canle de YouTube do Concello pode verse xa un vídeo de presentación que recolle fragmentos dos testemuños de persoas protagonistas nos diversos eidos das actividades produtivas, culturais, sociais, comerciais, naturais, musicais e artísticas do concello. Posteriormente iranse subindo os vídeos íntegros das 23 entrevistas levadas a cabo. Nas gravacións tamén se recollen imaxes do notable fotógrafo Francisco Buceta Gómez, máis coñecido como “Pasarín”, que o Concello ten en propiedade, coa intención de darlle maior visibilidade.

A estas «historias de vida» das nosas veciñas e veciños poderá accederse tamén a través dos códigos QR que se colocarán en diferentes puntos do termo municipal e que servirán para poñer en valor a historia local de Catoira e como legado para as vindeiras xeracións.

O proxecto foi impulsado polo Concello de Catoira e contou coa colaboración da Deputación de Pontevedra. A produción foi levada a cabo por Memoria Documental de Galicia S.L.

 

O PRESIDENTE DA DESTINATION VIKING ASSOCIATION ASISTE EN CATOIRA Á XORNADA “LOS VIKINGOS Y EL VINO EN GALICIA”

O Concello de Catoira acolleu o pasado mércores a xornada temática “Los vikingos y el vino en Galicia”, un evento que situou ao noso municipio no punto de encontro entre os itinerarios culturais europeos Camiños de Santiago e Ruta dos Vikingos.

A xornada comezou coa benvida do alcalde, Alberto García, seguida da presentación do libro “Los vikingos en Galicia”, de Eduardo Morales. A continuación interveu o presidente da Destination Viking Association (DVA) Ole Madsen, da que forma parte Catoira. Finalmente o catador Jorge Vila, director da Galicia Wine Academy, fixo unha presentación sobre a D.O. Rías Baixas rematando cunha cata de tres viños albariños. A xornada foi clausurada polo delegado territorial da Xunta de Galicia en Pontevedra, Luis López Diéguez.

Este evento supón o inicio dun proxecto que ten previsto levar a cabo o Concello de Catoira o vindeiro ano, e que inclúe a celebración dun seminario que pretende seguir afianzando os vínculos entre os dous itinerarios culturais, así como un estudo para trazar unha ruta viquinga entre Catoira e Santiago de Compostela. O seminario levarase  a cabo durante a primeira semana de agosto de 2022, coincidindo coa celebración da  Romaría Vikinga e da Festa do Albariño, ambas celebracións recoñecidas como festas de Interese Turístico Internacional. Un dos obxectivos deste proxecto, que conta co apoio da Xunta de Galicia, é aproveitar as relacións entre estas rutas para promover a internacionalización das dúas celebracións.

O PRESIDENTE DA DESTINATION VIKING ASSOCIATION ASISTE EN CATOIRA Á XORNADA “LOS VIKINGOS Y EL VINO EN GALICIA”

O vindeiro mércores, 10 de novembro, celébrase en Catoira a xornada temática “Los vikingos y el vino en Galicia”. O evento terá lugar na sala Celso Emilio Ferreiro do Concello de Catoira e inclúe o acto de presentación do libro “Los vikingos en Galicia”, de Eduardo Morales. A este acto asistirá -invitado polo alcalde Alberto García- o presidente da Destination Viking Association (DVA) Ole Madsen.

Este evento supón o inicio dun proxecto que ten previsto levar a cabo o Concello de Catoira o vindeiro ano, e que inclúe a celebración dun seminario sobre os vínculos entre os itinerarios culturais Ruta dos Viquingos e o Camiño de Santiago, así como un estudo para trazar unha ruta viquinga entre Catoira e Santiago de Compostela. O seminario levarase a cabo durante a primeira semana de agosto de 2022, coincidindo coa celebración da Romaría Vikinga e da Festa do Albariño, ambas celebracións recoñecidas como festas de Interese Turístico Internacional. Un dos obxectivos deste proxecto, que conta co apoio da Xunta de Galicia, é aproveitar as relacións entre estas rutas para promover a internacionalización das dúas celebracións.

Programa:

  • 10:30 Benvida do alcalde de Catoira, Alberto García
  • 10:45 Presentación de Eduardo Morales: “Los vikingos en Galicia”. Ex-chanceler da Embaixada de España en Dinamarca, arqueólogo e investigador, autor de numerosos artigos e publicacións sobre a cultura escandinava e sobre os viquingos.
  • 11:30 Presentación de Ole Madsen: Destination Viking Association. Director do Museo Arqueolóxico da Universidade de Stavanger (Noruega).
  • 12:00 Jorge Vila Fernández: presentación sobre o viño albariño. Catador e director da Galicia Wine Academy.
  • 12:30 Cata de viños albariños.
  • 13:00 Clausura a cargo do delegado territorial da Xunta de Galicia en Pontevedra.

Este acto de presentación está aberto a tódolos veciños que queiran acudir.

Lembramos tamén que a biblioteca pública municipal conta con exemplares do libro para o seu préstamo.

FOTOS DA PROCESIÓN DE CAVEIRAS 2021

Compartimos algunhas imaxes da Procesión de Caveiras. A pesar da chuvia, a veciñanza sumouse a esta celebración gozando da música da Banda de Catoira e dos 80 quilos de castañas que asou o persoal do Concello.

EXPOSICIÓN “ARTE E NATUREZA”

Este outono temos a oportunidade de gozar de novo dunha exposición que mestura a arte e a natureza a través de tres manifestacións diferentes: os bonsáis, a cerámica e a pintura.
Tito Riveiro mostra parte da súa colección de bonsáis nunha das etapas máis recomendables para admiralos. Consegue reducir a escala moitas variedades distintas da nosa flora autóctona e outras alóctonas para gozalas dunha forma diferente á que estamos habituados. Dada a súa fraxilidade, os bonsáis estarán expostos unicamente durante unha fin de semana: entre o días 22 e 24 de outubro.
A manipulación doutro material natural, pero inerte, complementa esta mostra. Do mesmo xeito que fixeron xa os nosos antepasados, Ana González, restauradora de bens culturais, utiliza a arxila como materia prima para as súas creacións. Nesta ocasión, a réplica que realizou do mosaico romano de Panxón será o elemento central dunha colección que trata de dar a coñecer a riqueza cultural que nos rodea co fin de contribuír á súa posta en valor e preservación.
A exposición complétase coa obra pictórica de Ángeles Garrido. Ten participado en numerosas mostras colectivas e individuais. Na súa obra procura a beleza con cada motivo elixido, camiñando entre o realismo e o expresionismo. Representa desde paisaxes que transmiten paz, retratos de personaxes que nos envían unha mensaxe, a escenas ecuestres de gran forza.

O CACTO recibe unha gran acollida por parte das/os visitantes

Tras tres semanas de apertura ao público, o Centro de Activación Cultural Torres de Oeste (CACTO), está a superar as expectativas en canto ao número de visitas e valoracións. Neste período, as instalacións expositivas recibiron a visita de mais de 500 persoas.

As persoas que se achegan ao centro aprecian especialmente a posibilidade de coñecer cómo se desenvolve a Romaría Vikinga. A visita permite un achegamento á pegada dos pobos nórdicos e á Romaría que se celebra cada verán en Catoira, como festa de interese turístico internacional, cunha videoprodución de grande formato no soto, que permite revivir o desembarco viquingo en primeira persoa.

O Cacto naceu como centro de interpretación de Torres de Oeste. Un achegamento á historia deste enclave: unha insua na desembocadura do río Ulla que constituíu a porta de acceso e fronteira de protección desde o océano cara ó interior de Galicia e as terras de Compostela “Torres de Oeste, chave e selo de Galicia”.

Con esta mirada faise un percorrido desde a pegada da prehistoria na contorna, os primitivos tráficos comerciais marítimos na cultura castrexa e continuados durante o Imperio Romano, cando xa atopamos a identificación de “Turris Augusti” na desembocadura do río Ulla. Na alta idade media o enclave cobrou un novo protagonismo, coa reconstrución e reforzo da fortificación, nomeada xa como “Castellum Honesti”, para facer fronte ás incursións das novas ameazas chegadas desde o mar: os “homes do norte” na procura de riquezas en Jakobusland -como chamaban a Galicia-. Máis aló da etapa de incursións viquingas, as costas galegas sufriron o asolagamento de piratas almorábides achegados por mar desde o sur da península. Neste contexto xurde a figura de Diego Xelmírez, que viviu de neno no propio castelo de Torres de Oeste, e que logo, xa como arcebispo de Santiago, deu un pulo ás defensas da ría de Arousa, no propio Castelo de Oeste, e promoveu a construción, nos estaleiros do río Ulla, da primeira flota de galeras dos reinos cristiáns da Península Ibérica, para defender e combater con éxito as incursións nas costas das rías galegas.

O centro conta con paneis informativos, exhibición de réplicas que contextualizan diferentes etapas da historia das Torres, e varias unidades audiovisuais que permiten afondar de xeito interactivo e inmersivo nos contidos da exposición. No andar superior atópase un espazo para actividade cultural dedicado a presentacións e talleres para visitas escolares. Namentres, aprovéitase dito espazo como extensión expositiva cunha ollada ao patrimonio cultural do Concello de Catoira.

Top