Evolución da situación epidemiolóxica derivada da covid-19

En Catoira, ao igual que na maior parte de Galicia, a evolución dos contaxios derivados do Covid-19 está sendo negativa ao longo destes últimos días, alcanzando unha incidencia acumulada de casos superior a 250, por cada 100.000 habitantes, o que vai a elevar ao noso municipio ao nivel de restricións máximo, ao abeiro do Decreto 3/2021 e da Orde da Conselleira de Sanidade, publicada o día 13 de xaneiro de 2021 pola que se modifica a Orde do 3 de decembro de  2020,  pola  que  se  establecen  medidas  de  prevención  específicas  como consecuencia da evolución da situación epidemiolóxica derivada do COVID-19 na Comunidade Autónoma de Galicia.

Para poder superar este escenario, e regresar á normalidade canto antes, é necesario pedir a toda a veciñanza un maior grao de responsabilidade individual e colectiva, polo que lles solicitamos que cumpran coas medidas establecidas por parte da Xunta de Galicia.

Dende o Concello de Catoira estamos en contacto permanente con todas as administracións, en concreto, coa autoridade sanitaria a través da Xerencia de Xestión Integrada de Pontevedra e o Salnés, para analizar a evolución da incidencia que presenta a enfermidade dentro do noso termo municipal e estudar se é necesaria adoptar medidas ao respecto. Unha delas xa acordada, foi a suspensión das actividades programadas polo Entroido, e que se ían celebrar o vindeiro mes de febreiro.

Calquera veciño/a que se atope afectado pola enfermidade, pode poñerse en contacto co departamento de Servizos Sociais, para que poidan facilitarlle o antes posible a axuda que poida necesitar, xa que ó Concello non pode dispoñer dos seus datos persoais.

Nesta web, iremos publicando a información facilitada pola Consellería de Sanidade (tamén pode obterse no seguinte enlace:  https://coronavirus.sergas.gal/datos/), para que a veciñanza poida consultar a evolución da enfermidade no termo municipal de Catoira, e en Galicia.

Desexámoslle a toda a veciñanza afectada que teñan unha pronta recuperación, pedimos unha vez máis, que se cumpra coas medidas de prevención vixentes e reiteramos que a veciñanza que necesite axuda se poña en contacto co Concello.

A Deputación subvenciona a produción teatral e audiovisual “(In)visible Luz”

A Deputación de Pontevedra concedeu unha subvención por importe de 1839,20 € para financiar a posta en escena e a produción audiovisual da obra”[IN]VISIBLE LUZ”, da Escola Municipal de Teatro de Catoira. Esta peza, creada  a partir dun fragmento de “Invisibles. Relatos do maltrato” de Montse Fajardo, estreouse no auditorio de Catoira o día 29 de novembro, cunha magnífica acollida entre o público. Volveuse representar o día 18 de decembro para o alumnado de 2º, 3º e 4º de ESO do CPI Progreso de Catoira.

Proximamente publicaremos o vídeo completo desta dramatización.

Agradecemos o grande esforzo e a colaboración de todas as persoas implicadas neste proxecto.

Elenco:

María Cruz Conde Conde

Élida Míguez

Ana Touriño Grela

Julia Riveiro Castiñeiras

Pedro Rey

Eva Rodriguez Carril

Dramaturxia e dirección: Tero Rodríguez

Texto orixinal: Invisibles de Montse Fajardo Pérez

Espazo sonoro: Juan Manteiga

Cámara, edición e montaxe: Breogán Martínez

Música: Néboa

Produción: Concello de Catoira
Torres de Oeste

O Concello de Catoira repón a campá e realiza obras de reparación na Capela de Santiago das Torres de Oeste

O Concello de Catoira está a traballar nun proxecto de recuperación da Capela de Santiago, que forma parte do conxunto monumental das Torres de Oeste.

A actuación conta cun orzamento de 8231 euros, e inclúe a reposición da campá da capela, que foi roubada hai uns anos, así como a reinstalación do perpiaño de pedra da espadana e da cruz que a coroa. Tamén está prevista a restitución das pequenas ventás das bufardas, con cristal antivandálico, e o acondicionamento das dúas portas. No interior vaise actuar na mellora do estucado.

Ademais, xa se procedeu a realizar labores de limpeza nas pedras das paredes das torres, eliminando toda a vexetación enraizada.

Catoira acolle o proxecto “𝗖𝗔𝗦𝗧𝗘𝗟𝗔𝗢 𝗘 𝗢𝗦 𝗜𝗥𝗠𝗔́𝗡𝗦 𝗗𝗔 𝗟𝗜𝗕𝗘𝗥𝗗𝗔𝗗𝗘”

O vindeiro venres, 13 de novembro, celébrase no Auditorio Municipal o acto de presentación do proxecto “Castelao e os irmáns da liberdade”, que inclúe unha exposición e a proxección dun filme.
Esta actividade prográmase coincidindo co 70 cabodano de Castelao e o centenario da Xeración Nós (1920-2020). É unha oportunidade para homenaxear o ideario fondamente humanista, transformador e sempre actual de Castelao, protagonista desa xeración histórica que, a través da produción artística e cultural, a defensa da nosa lingua e a actuación política posterior, se percatou do seu deber social de crear para sempre a cultura galega.
O acto terá lugar o 𝘃𝗲𝗻𝗿𝗲𝘀 𝟭𝟯 𝗮́𝘀 𝟮𝟬:𝟬𝟬 𝗵.
O aforo do Auditorio é de 60 prazas, que poden reservarse enviando os 𝗻𝗼𝗺𝗲𝘀 𝗲 𝗮𝗽𝗲𝗹𝗶𝗱𝗼𝘀 𝗲 𝘂𝗻 𝘁𝗲𝗹𝗲́𝗳𝗼𝗻𝗼 𝗱𝗲 𝗰𝗼𝗻𝘁𝗮𝗰𝘁𝗼 ao correo 𝗰𝘂𝗹𝘁𝘂𝗿𝗮@𝗰𝗮𝘁𝗼𝗶𝗿𝗮.𝗴𝗮𝗹 ou no teléfono 𝟵𝟴𝟲𝟱𝟰𝟲𝟬𝟭𝟰 (ext. 2).
Seguiranse as medidas sanitarias establecidas frente ao Covid19.
Trailer do filme:
Top