Inscrición para tripulación dos barcos viquingos

O martes 13 de xullo ábrese o prazo para inscribirse como tripulación das seis embarcacións viquingas que participarán o día 1 de agosto nun ascenso e descenso polo río Ulla desde a Praia Fluvial ata a Illa Castrivello. NON HABERÁ DESEMBARCO NAS TORRES.

  • REQUISITOS: Ser maior de idade e aceptar as normas establecidas pola Dirección General de la Marina Mercante do Ministerio de Fomento.
  • PRAZAS: Haberá 36 prazas, distribuídas en 6 embarcacións. As prazas cubriranse por rigorosa orde de inscrición.
  • INSCRICIÓN: O formulario de inscrición deberá presentarse no Rexistro do Concello, presencialmente ou a través da sede electrónica. O documento poderá descargarse da sede electrónica (sección Anuncios).
  • DOCUMENTACIÓN: Fotocopia do DNI e formulario de inscrición cuberto e asinado.
  • PRAZO: Do 13 de xullo ata o 23 de xullo de 2021.

O formulario de inscrición estará dispoñible na seguinte ligazón:

https://catoira.sedelectronica.gal/board/975040b6-f59b-11de-b600-00237da12c6a/

Para a tramitación a través da sede electrónica deberán descargar o formulario, cubrir os datos e asinalo. Logo deberán presentalo a través do procedemento “Instancia xeral”, adxuntando o formulario e maila copia do DNI. NON SERÁN ADMITIDAS AS SOLICITUDES PRESENTADAS ANTES DO MARTES 13 DE XULLO.

Percorrido virtual en 360° pola Ruta Xacobea do Mar de Arousa e Ulla

A Fundación Ruta Xacobea do Mar de Arousa e Ulla acaba de publicar na súa web un percorrido virtual en 360º polas distintas localizacións da ruta, incluída Catoira. No noso caso, poden visitarse as Torres de Oeste, desde diferenes perspectivas, e os muíños de vento.

A visita pode realizarse a través dun PC ou dispositivo móbil. Para unha experiencia máis realista, recoméndase o uso de gafas 3D.

Abra a seguinte ligazón para comezar o percorrido:

Tour virtual

(Para abrir o mapa e ir directamente a un punto da Ruta, debe facer clic no icono de localización que aparece na esquina inferior esquerda)

Web da Fundación: https://arousaeullafundacionxacobea.com/

Aviso sobre o reparto de máscaras para personas vulnerables

Esta semana, o reparto de máscaras nos centros sociais para persoas máis vulnerables a posibles contaxios por coronavirus será do seguinte xeito:
– XOVES 28 en ABALO, de 10:00 a 13:00 h
– VENRES 29 en OESTE e DIMO, de 10:00 a 13:00 h

Ademais, poden recollerse CALQUERA DÍA, de luns a venres, na BIBLIOTECA de 9:00 a 14:30 h.

Pedimos desculpas polas molestias que poida causar este cambio.

O Goberno de Catoira favorecerá a ampliación de terrazas

Ante a posibilidade de apertura das terrazas dos establecementos hostaleiros, e co fin de favorecer a volta á actividade deste colectivo profesional, o Goberno Local decidiu permitir, dentro das súas competencias, a ampliación destes espazos a aqueles locais que teñan a posibilidade de facelo. Esta medida non implicará ningún gravame para estes negocios, que xa non viñan aboando ningunha taxa por posuír terrazas.
Esta iniciativa súmase á decisión do Grupo de Goberno de levar ao pleno da Corporación unha proposta para reducir a taxa de recollida de lixo a aqueles establecementos e empresas que pecharon a súa actividade con motivo do decreto do estado de alarma. Esta redución faríase extensible tamén ás persoas traballadoras que sufriron un ERTE ou que pasaron a unha situación de desemprego por este motivo.

Medidas para o reinicio da actividade dos mercados

Diante da Resolución da Consellería de Medio Rural de levantar a partir do 4 de maio a prohibición relativa á realización dos mercados tradicionais, con venda directa de produtos agrícolas e gandeiros, o Concello de Catoira informa das medidas de prevención que deben adoptar, tanto vendedoras/es como usuarias/os, seguindo as recomendacións da Federación Galega de Municipios de Provincias (Fegamp):

Ábrese o prazo de preinscrición na Escola Infantil Municipal

O Departamento de Benestar Social do Concello de Catoira informa que se abre de novo o prazo de preinscrición na Escola Infantil Municipal para o vindeiro curso 2020/2021, que quedou suspendido ao decretarse o estado de alarma, e que agora se reactiva por necesidade de xestión do servizo.

As persoas interesadas poden presentar a solicitude, tanto para renovación de praza (para alumnado que xa estivo matriculado no curso 2019/2020) como para novo ingreso, dende o 8 de maio ata o 8 de xuño.

Os formularios de solicitude poden descargarse e presentarse telematicamente a través da sede electrónica do Concello (https://catoira.sedelectronica.gal/), ou ben presencialmente no Departamento de Benestar Social solicitando cita previa por teléfono (986 546 014).

O Concello entrega novas máscaras a toda a veciñanza

O Concello de Catoira comezará a repartir mañá novas máscaras hixiénicas nos domicilios, unha unidade para cada veciña/o, incluídas/os nenas/as.
Trátase de máscaras de tres capas automontables que foron adquiridas polo Concello. Acompáñanse dunhas sinxelas instrucións para colocar as gomas. As máscaras dispoñen dunha capa exterior de cor azul que non traspasa líquidos, unha capa intermedia absorbente como filtro e outra capa interior de cor branca. Segundo indicacións do persoal do centro médico estariamos falando dunha protección homologable a un modelo KN 95.

Máscaras adaptadas para a poboación infantil
Para as/os nenas/os confecciónanse 400 máscaras de menor tamaño, xa montadas. Están feitas cos mesmos materiais, pero adaptadas a tamaño infantil por voluntarias solidarias de Catoira de forma altruísta.


Lembramos que as persoas máis vulnerables a posibles contaxios poden solicitar máis unidades no Concello, e tamén aquelas que non as recibisen no seu domicilio unha vez finalizado o reparto na súa zona.

O Goberno local reforza a seguridade no Servizo de Axuda no Fogar

O Goberno local convocou esta mañá unha reunión no Concello para incrementar as medidas de seguridade na prestación do Servizo de Axuda no Fogar (SAF).

Na reunión participou persoal sanitario do centro de saúde, do departamento de Benestar Social do Concello e o persoal que traballa no SAF, un total de 18 persoas.

Este encontro serviu para reforzar as instrucións relativas ás medidas de seguridade que deben seguir as traballadoras durante a prestación do servizo, especialmente as referidas ao manexo dos equipos de protección (máscaras, guantes, roupa, desinfectantes..), así como á xestión dos residuos xerados polas/os usuarias/os do servizo, sobre todo no caso de traballar con persoas infectadas polo coronavirus.

O Concello entregou ao persoal do SAF máscaras destinadas ás persoas usuarias do servizo e destacouse a importancia de asesoralas sobre o uso das mesmas. O persoal do SAF conta cos equipos propios proporcionados pola empresa concesionaria.

Segue en suspenso o prazo para solicitar praza na Escola Infantil Municipal

Ante as dúbidas formuladas por algunhas persoas respecto do período de preinscrición para solicitar praza na Escola Infantil Municipal para o vindeiro curso 2020/2021 aclaramos que:

– O 10 de marzo, catro días antes de decretarse o estado de alarma, publicouse un bando informando da apertura do prazo.

– Que o bando anterior quedou sen vixencia unha vez que se decretou o estado de alarma o día 14, ao suspenderse todos os prazos administrativos.

– Que, polo tanto, segue en suspenso o prazo de preinscrición ata que se levante o estado de alarma. Cando isto suceda informaremos dos novos prazos.

AVISO: “Desaconséllase o uso de fontes públicas”

Seguindo as indicacións da Consellería de Sanidade, desaconséllase o consumo de auga de fontes públicas durante o estado de alarma para a xestión da crise sanitaria ocasionada polo CoVID19, xa que non se pode garantir a desinfección e a seguridade das mesmas.

O Concello xa procedeu a sinalizar con esta recomendación as fontes do termo municipal de Catoira.

Top